លោក ហ៊ុន សែន ថាកុំលាបពណ៌ពលរដ្ឋជាក្រុមប្រឆាំង
ភ្នំពេញៈ លោក ហ៊ុន សែន នាយករដ្ឋមន្ត្រី និងជាប្រធានគណបក្សប្រជាជនកម្ពុជាកាលពីចុងសប្ដាហ៍មុនបានព្រមានដល់មន្ត្រីមូលដ្ឋានហើយជាក្រុមការងារចុះពង្រឹងគណបក្សនៅតាមមូលដ្ឋានកុំឲ្យប្រើនយោបាយលាបពណ៌ដោយចាត់ទុកពលរដ្ឋដែលមិនបានបង្ហាញឆន្ទៈគាំទ្របក្សកាន់អំណាចថាជាក្រុមប្រឆាំង ព្រោះជានយោបាយគ្រោះថ្នាក់ដល់បក្សកាន់អំណាច។ យោងតាមការថ្លែងនៅចំពោះមុខថ្នាក់ដឹកនាំ និងមន្ត្រីគណបក្សរាប់ពាន់នាក់ក្នុងពិធីសម្ពោធអគារស្នាក់ការគណបក្សប្រជាជនកម្ពុជានៅស្រុកត្បូងឃ្មុំ ខេត្តត្បូងឃ្មុំ កាលពីថ្ងៃសោរ៍។
អនុសាសន៍របស់លោក ហ៊ុន សែន ដែលថ្លែងនៅក្នុងពិធីសម្ពោធនោះមិនត្រូវបានផ្សព្វផ្សាយជាសាធារណៈទេ ប៉ុន្តែសារព័ត៌មាន Fresh News បានដកស្រង់សម្ដីរបស់លោកថា៖ «នៅមានមេភូមិ មេឃុំខ្លះទៀតបង្កបញ្ហាថ្នាំងថ្នាក់ជាមួយប្រជាពលរដ្ឋដូចជាជម្លោះដីធ្លីជាដើមហើយលាបពណ៌គេថា ជាបក្សប្រឆាំង។ ចំណុចនេះគ្រោះថ្នាក់ខ្លាំងណាស់សម្រាប់បក្ស»។
Fresh News បានស្រង់សម្ដីលោកនាយករដ្ឋមន្ត្រីបន្តថា៖ «ដើម្បីបញ្ចៀសការថ្នាំងថ្នាក់ពីប្រជាពលរដ្ឋ សមាជិកគណបក្សប្រជាជនទាំងអស់ត្រូវធ្វើអំពើល្អនៅគ្រប់កន្លែង ជាពិសេសការផ្តល់សេវាសាធារណៈជូនប្រជាពលរដ្ឋដូចជា សំបុត្រកំណើត សំបុត្រអាពិពាហ៍ពិពាហ៍ជាដើម និងត្រូវធ្វើហើយយកជូនប្រជាពលរដ្ឋដល់ផ្ទះ»។
កញ្ញា សុង ស្រីលាភ សកម្មជនសហគមន៍បឹងកក់ដែលសកម្មក្នុងការតវ៉ាជាមួយអាជ្ញាធរកន្លងមកបានបង្ហាញនូវឆន្ទៈគាំទ្រអនុសាសន៍លោកនាយករដ្ឋមន្ត្រី ប៉ុន្តែអះអាងថាហាក់យឺតពេលបន្ដិចក្នុងការដាស់តឿនមន្ត្រីទាំងនោះ។
កញ្ញា ស្រីលាភ បានថ្លែងថា៖ «ពួកយើងជាប្រជាពលរដ្ឋដែលរស់នៅក្នុងតំបន់បឹងកក់ដែលរងការបណ្ដេញចេញដោយការអភិវឌ្ឍ មន្ត្រីថ្នាក់ក្រោមដែលតែងតែចោទប្រកាន់ប្រជាពលរដ្ឋរងគ្រោះដីធ្លីនៅពេលមានបញ្ហាកើតឡើង។ ប្រជាពលរដ្ឋគ្រាន់តែធ្វើការតស៊ូមតិដើម្បីទាមទារសិទ្ធិលំនៅឋានសមរម្យដើម្បីរស់នៅ បែរជាចោទប្រជាពលរដ្ឋជាពួកប្រឆាំង គណបក្សប្រឆាំងជាដើម»។ «ខ្ញុំគិតថា គាត់មិនគួរប្រើតែឱកាសនេះ គាត់គួរតែអនុវត្តរហូតដើម្បីឲ្យប្រជាពលរដ្ឋមានសេចក្ដីសុខ»។
លោក ម៉ៅ មុន្នីវណ្ណ អតីតតំណាងរាស្ត្រនៃអតីតគណបក្សសង្គ្រោះជាតិបានអះអាងថាការថ្លែងរបស់លោក ហ៊ុន សែន គឺជាយុទ្ធសាស្ត្ររបស់បក្សកាន់អំណាចក្នុងការទាញប្រជាប្រិយភាពមុនការបោះឆ្នោតដែលនឹងប្រព្រឹត្តទៅនៅថ្ងៃទី ២៩ ខែកក្កដា ឆ្នាំ ២០១៨។
លោកថ្លែងថា៖ «បើសិនជាអ្វីដែលលោកនាយករដ្ឋមន្ត្រីគាត់ថ្លែងជាសាធារណៈ ហើយមន្ត្រីរបស់គាត់ធ្វើទៅតាមអ្វីដែលគាត់ថ្លែងហ្នឹង ខ្មែរយើងគឺបានសុខដុមរមនាជាមួយគ្នា គ្មានការបែងចែកខ្មែរនេះ ឬខ្មែរនោះទេ»។
លោក សុខ ឥសាន អ្នកនាំពាក្យគណបក្សកាន់អំណាចអះអាងថាប្រសាសន៍របស់ប្រមុខដឹកនាំគឺជាការណែនាំដល់មន្ត្រីថ្នាក់ក្រោមកុំឲ្យមានការរើសអើងនិន្នាការនយោបាយ និងបម្រើប្រជាពលរដ្ឋឲ្យបានល្អប៉ុណ្ណោះ។
លោកថ្លែងថា៖ «វាជាការពិត ការលើកឡើងរបស់សម្ដេច ទោះបីថាគណបក្សជាអ្នកកាន់អំណាចគឺបម្រើប្រជារាស្ត្រគ្រប់និន្នាការនយោបាយ អ៊ីចឹងទោះបីបងប្អូនប្រជាពលរដ្ឋនៅកន្លែងណា មាននិន្នាការណា ក៏សេវាសាធារណៈរបស់រដ្ឋអំណាចមូលដ្ឋានគឺបម្រើប្រជាពលរដ្ឋដោយស្មើគ្នា តួនាទី ភារកិច្ចរបស់គាត់ម្នាក់ៗ ដើម្បីធ្វើយ៉ាងម៉េចក៏ដោយ កុំឲ្យពាក់ព័ន្ធនឹងការរើសអើងនយោបាយជាមួយពលរដ្ឋ»។
លោក ហ្វីល រ៉ូបឺតសុន អនុប្រធានអង្គការឃ្លាំមើលសិទ្ធិមនុស្ស (HRW) ប្រចាំតំបន់អាស៊ី ដែលមានមូលដ្ឋាននៅសហរដ្ឋអាមេរិក ថ្លែងកាលពីម្សិលមិញថា៖ «លោកនាយករដ្ឋមន្ត្រី ហ៊ុន សែន កំពុងតែធ្វើជាអ្នកនយោបាយគំរូខាងយកផ្គាប់ផ្គន់ ដោយនិយាយអ្វីដែលលោកគិតថា ធ្វើឲ្យលោកមានប្រជាប្រិយភាពជាមួយនឹងប្រជាជន។ ក៏ប៉ុន្តែតាមការពិតគឺលោកជាស្ថាបត្យករនៃគោលនយោបាយរដ្ឋាភិបាលដែលមួលបង្កាច់គណបក្សប្រឆាំងដោយការកុហកបង្កើតរឿងអាស្រូវ និងអនុញ្ញាតឲ្យក្រុមហ៊ុនដែលមានទំនាក់ទំនងជិតស្និទ្ធនឹងរដ្ឋាភិបាលរបស់លោកធ្វើការរឹបអូសដីរបស់ប្រជាជន។ ដូច្នេះហើយលោកគួរតែបន្ទោសខ្លួនឯង។ មន្ត្រីរដ្ឋាភិបាលនៅខេត្តត្បូងឃ្មុំគ្រាន់តែកំពុងតែនិយាយ និងធ្វើអ្វីដែលពួកគេគិតថាទទួលបានការអនុញ្ញាតពីលោកនាយករដ្ឋមន្ត្រី ហ៊ុន សែន»៕
ប្រភពពី៖phnom phen post
No comments