ព្រឹទ្ធសភានឹងលើកយកច្បាប់សញ្ជាតិថ្មីមកជជែកដើម្បីអនុម័តបន្តនៅថ្ងៃទី១១ មិថុនា
ព្រឹទ្ធសភា នឹងលើកយកច្បាប់ថ្មីស្ដីពីសញ្ជាតិ ដែលរដ្ឋសភាជាតិទើបអនុម័តរួច មកធ្វើការជជែកវែកញែក ដើម្បីអនុម័តបន្ត នៅថ្ងៃចន្ទ ទី១១ មិថុនា ស្អែកនេះ ក្រោមអធិបតីភាពរបស់ លោក សាយ ឈុំ ប្រធានព្រឹទ្ធសភា មុននឹងសម្រេចបញ្ជូនច្បាប់ថ្មីនេះ ទៅឲ្យក្រុមប្រឹក្សាធម្មនុញ្ញ ពិនិត្យមើលអំពីធម្មនុញ្ញភាពដើម្បីដាក់ឲ្យព្រះមហាក្សត្រ ឡាយព្រះហស្ថលេខា។
សេចក្ដីប្រកាសព័ត៌មានរបស់អគ្គលេខាធិការដ្ឋានព្រឹទ្ធសភា ស្ដីពីលទ្ធផលកិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា កាលពីថ្ងៃទី០៨ មិថុនា ឲ្យដឹងថា ព្រឹទ្ធសភា កំណត់យកថ្ងៃទី១១ មិថុនា ស្អែកនេះ បើកសម័យប្រជុំលើកទី១ នីតិកាលទី៤ របស់ខ្លួន ដើម្បីពិនិត្យ និងផ្ដល់យោបល់លើរបៀបវារៈចំនួន៤។ របៀបវារៈទាំង ៤នោះ រួមមាន៖ ការពិនិត្យ និងឲ្យយោបល់លើសេចក្ដីព្រាងច្បាប់ស្ដីពី ការរៀបចំ និងការប្រព្រឹត្តិទៅនៃគណៈរដ្ឋមន្ត្រី សេចក្ដីព្រាងច្បាប់ស្ដីពីសញ្ជាតិ សេចក្ដីព្រាងច្បាប់ស្ដីពី ការអនុម័តយល់ព្រមលើកិច្ចព្រមព្រៀងស្ដីពីការបង្កើតអង្គការសហប្រតិបត្តិការព្រៃឈើអាស៊ី និងសេចក្ដីព្រាងច្បាប់វិសោធនកម្ម ច្បាប់ស្ដីពីការគ្រប់គ្រង និងការធ្វើអាជីវកម្មធនធានរ៉ែ។
រដ្ឋសភានៃរបបក្រុងភ្នំពេញ បានអនុម័តជាផ្លូវការ សេចក្ដីព្រាងច្បាប់ថ្មីស្ដីពីសញ្ជាតិ នៅក្នុងសម័យប្រជុំលើកទី១០ របស់ខ្លួន កាលពីថ្ងៃទី៣១ ឧសភា ដោយចំនួន ១១២សំឡេង លើ ១២៣ សំឡេង។ សេចក្ដីព្រាងច្បាប់ថ្មីស្ដីពីសញ្ជាតិនេះ មាន១០ជំពូក និងចែកចេញជា ៣៨មាត្រា។ បើតាមសេចក្ដីថ្លែងហេតុ ច្បាប់នេះមានគោលដៅដើម្បីកំណត់នូវសិទ្ធិទទួលបាន និងសិទ្ធិលះបង់សញ្ជាតិខ្មែរ។ សិទ្ធិទទួលបានសញ្ជាតិខ្មែរនេះរួមមាន ការទទួលបានសញ្ជាតិខ្មែរពីកំណើត ដោយការស្មុំកូនពេញលេញ ដោយចំណងអាពាហ៍ពិពាហ៍ និងដោយសញ្ជាតូបនីយកម្ម។ ច្បាប់ថ្មីស្ដីពីសញ្ជាតិនេះ រងការរិះគន់ថា ធ្វើឡើងដោយពុំមានការពិគ្រោះយោបល់ឲ្យបានទូលំទូលាយជាមួយពលរដ្ឋ និងសង្គមស៊ីវិល ព្រមទាំងហាក់មានលក្ខណៈជាការសម្ងាត់ និងថាអាចនឹងក្លាយជាគ្រោះមហន្តរាយថ្មីមួយទៀតសម្រាប់អនាគតកម្ពុជា៕
ប្រភពពី៖RFA
No comments