"បក្សប្រឆាំងនៅតែមានឥទ្ធិពលខ្លាំងធ្វើឱ្យលោក ហ៊ុន សែន ភ័យខ្លាច ទោះត្រូវបានរំលាយក្ដី"
អ្នកវិភាគលើកឡើងថា លោកនាយករដ្ឋមន្ត្រី ហ៊ុន សែន នឹងមិនទទួលជោគជ័យលើការអំពាវនាវឲ្យកម្មករ ពលរដ្ឋទៅបោះឆ្នោតឲ្យគណបក្សរបស់លោក ម្ដងហើយម្ដងទៀតឡើយ ទោះបីជាលោក នាយករដ្ឋមន្ត្រី អះអាងថា គណបក្សរបស់លោក មានអ្នកសមាជិកប្រមាណ ៥លាននាក់ហើយក្ដី ប៉ុន្តែគណបក្សប្រជាជនកម្ពុជាក្រោមការដឹកនាំរបស់លោក ហ៊ុន សែន មិនអាចរក្សាសមាជិករបស់ខ្លួន៥លាននាក់នេះបានឡើយ។
អ្នកវិភាគលើកឡើងថា លោក ហ៊ុន សែន កំពុងភ័យខ្លាចពលរដ្ឋមិនទៅបោះឆ្នោតតាមការអំពាវនាវរបស់មេដឹកនាំគណបក្សសង្គ្រោះជាតិ ទោះបីជាលោកអះអាងថា សមាជិកបក្សរបស់លោកមាន៥លាននាក់ហើយក្ដី។
លោកបណ្ឌិត ឡៅ ម៉ុងហៃ ពន្យល់ថា របបលោក ហ៊ុន សែន បានរំលាយគណបក្សសង្គ្រោះជាតិ នឹងមិនឲ្យចូលរួមការបោះឆ្នោតជ្រើសតាំងតំណាងរាស្ត្រនីតិកាលទី៦ ថ្ងៃទី២៩ កក្កដាបានសម្រេចក្ដី ប៉ុន្តែលោក ហ៊ុន សែន នៅតែខ្លាចស្រមោលសង្គ្រោះជាតិ ដែលលោកកំពុង នៅតែអំពាវនាវឲ្យពលរដ្ឋបោះឆ្នោតជូនគណបក្សរបស់លោកបន្តទៀត។ លោក បណ្ឌិត ឡៅ ម៉ុងហៃ បន្ថែមថា គណបក្សតូចៗ ដែលចូលរួមការបោះឆ្នោតនោះ មិនមែនជាដៃគូពិតប្រាកដរបស់គណបក្សប្រជាជនកម្ពុជាឡើយ។ យ៉ាងនេះក្ដី លោក បណ្ឌិត ឡៅ ម៉ុងហៃ អះអាងថា គណបក្សប្រឆាំងនៅតែមានឥទ្ធិពលខ្លាំងទោះបីជា គណបក្សនេះ ត្រូវបានរំលាយហើយក្ដី៖ «មិនច្បាស់ថារំលាយនោះ រលាយសាបសូន្យនោះទេ គឺនៅមានឥទ្ធិពលអ្នកខាងក្រៅ»។
លោកនាយករដ្ឋមន្ត្រី ហ៊ុន សែន នៅក្នុងពិធីជួបកម្មករប្រមាណ២ម៉ឺននាក់នៅខែត្រកំពង់ស្ពឺ អំពាវនាវឲ្យកម្មករបោះឆ្នោតជូនជូនគណបក្សរបស់លោកបន្តទៀត។ ជាងនេះទៀត លោក ហ៊ុន សែន អំពាវនាវឲ្យប្រជាពលរដ្ឋប្រើប្រាស់សិទ្ធិរបស់ខ្លួនទៅបោះឆ្នោតឲ្យបានគ្រប់គ្នា ហើយលោក អះអាងថា គណបក្សរបស់លោក មានសមាជិកប្រមាណ៥លាននាក់ ក្នុងចំណោមពលរដ្ឋបានទៅចុះឆ្នោតជាង៨លាននាក់៖ «ពួកអ្នកបក្សប្រឆាំងទៅបោះឆ្នោតកាន់តែតិច សន្លឹកឆ្នោតកាន់តែល្អសម្រាប់បក្សកាន់អំណាច បក្សដែលឈ្នះឆ្នោត ដូច្នេះអ្នកដែលមិនពេញចិត្តបក្សប្រជាជនកម្ពុជាមិនបាច់ទៅបោះឆ្នោតទេ»។
មិនត្រឹមតែឃោសនាឲ្យបោះឆ្នោតឲ្យគណបក្សលោកនោះទេ។ លោក ហ៊ុន សែន ថែមទាំងឃោសនាឲ្យកម្មករបោះឆ្នោតឲ្យកូនប្រុសលោក គឺលោក ហ៊ុន ម៉ានី ដែលបានចាញ់ឆ្នោតកាលបោះឆ្នោតឆ្នាំ២០១៣ នៅខេត្តកំពង់ស្ពឺ។ នេះមិនមែនជាលើកទី១ទេ ដែលលោក ហ៊ុន សែន អំពាវនាវឲ្យពលរដ្ឋទៅបោះឆ្នោតជូនគណបក្សលោក ពេលខ្លះលោក ថែមទាំងអង្វរកម្មករថែមទៀត។ លោក ហ៊ុន សែន ធ្លាប់លើកឡើងថា លោកគ្មានចង់បានអ្វីក្រៅពីការបោះជូនលោកបន្តដឹកនាំទៀតឡើយ។
លោកបណ្ឌិត ឡៅ ម៉ុងហៃ បញ្ជាក់ថា សមាជិករបស់គណបក្សប្រជាជនកម្ពុជាចំនួន ៥លាននាក់នោះ មិនប្រាកដថា បោះឆ្នោតឲ្យគណបក្សប្រជាជនកម្ពុជាឡើយ ព្រោះថា ការបោះឆ្នោតកន្លងមកជាឧទាហរណ៍ស្រាប់។ លោកបន្ថែមថា អ្វីដែលលោក ហ៊ុន សែន ភ័យនៅពេលនេះ គឺខ្លាចពលរដ្ឋមិនទៅបោះឆ្នោតច្រើន ហើយរដ្ឋាភិបាលរបស់លោកនឹងក្លាយជារដ្ឋាភិបាលដែលមិនត្រូវបានទទួលស្គាល់ពីសហគមន៍អន្តរជាតិ៖ «៥លាននាក់ ដូចជាការបោះឆ្នោតលើកមុនៗ បក្សប្រជាជនកម្ពុជាបានតែជាង ៣លាននាក់ទេ»។
លោក សម រង្ស៊ី អតីតប្រធានគណបក្សប្រឆាំង និងជាប្រធានចលនាសង្គ្រោះជាតិ ថ្លែងនៅ ក្នុងវេទិកាជួបជុំអ្នកគាំទ្របក្សប្រឆាំង នៅទីក្រុងវែនឃូវើ (Vancouver ) ប្រទេសកាណាដា កាលពីថ្ងៃទី២១ ឧសភា ថា សម្រាប់អ្នកស្នេហាជាតិ ដែលបានធ្វើដំណើរមកដល់ផ្លូវបំបែក គឺត្រូវបត់ស្តាំតាមផ្លូវសង្គ្រោះជាតិ ដើម្បីសុវត្ថិភាពខ្លួនឯង ក្រុមគ្រួសារ និងសង្គមជាតិ។ លោកបន្ថែមថា កុំបត់ឆ្វេងតាម ហ៊ុន សែន ចង់បាន ត្រូវបត់ស្តាំវិញ គឺបត់ចូលផ្ទះវិញ ដោយមិនទៅបោះឆ្នោតក្លែងក្លាយ នៅថ្ងៃទី ២៩ ខែកក្កដា ខាងមុខនេះ។ ក្រៅពីនេះទៀត លោក សម រង្ស៊ី អះអាងថា មានតែការរួបរួមគ្នាទេ ដែលទទួលបានជោគជ័យលើរបបផ្ដាច់ការរបស់លោក ហ៊ុន សែន៖ «គេនឹងមើលថាមានអ្នកបោះឆ្នោតប៉ុន្មាន? អ្នកទៅបោះឆ្នោតគឺបោះអោយ ហ៊ុន សែន ទាំងអស់ ប៉ុន្តែបើអ្នកមិនទៅបោះឆ្នោតច្រើនជាងអ្នកទៅបោះឆ្នោត គឺសង្គ្រោះជាតិឈ្នះហើយបងប្អូន»។
គណៈកម្មាធិការជាតិរៀបចំការបោះឆ្នោតបានចេញសេចក្ដីប្រកាសព័ត៌មាននៅថ្ងៃទី២៣ ឧសភា ថា គ.ជ.ប បានទទួលស្គាល់ចុះបញ្ជីគណបក្សនយោបាយសម្រាប់ការប្រកួតប្រជែងនៅថ្ងៃទី២៩ កក្កដា ខាងមុខ គ្រប់ចំនួន២០គណបក្សហើយ។ គណបក្សដែលគ.ជ.បទទួលស្គាល់ ២ទៀតចុងក្រោយនេះ គឺគណបក្សរស្មីខេមរា និងគណបក្សជនជាតិដើមប្រជាធិបតេយ្យកម្ពុជា។
ទោះបីជាយ៉ាងនេះក្ដី នាយកអង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) លោក ប្រេដ អាដាម (Brad Adams) ចាត់ទុកការបោះឆ្នោត ខាងមុខថា មានភាពមិនសេរី ត្រឹមត្រូវ និងយុត្តិធម៌ទេ ហើយថា ការបោះឆ្នោតនេះ ជារឿងកំប្លែង និងឆាកល្ខោនបិទបាំងការពិត ដែលលោក ហ៊ុន សែន កំពុងចង់បំភ្លៃតែប៉ុណ្ណោះ ព្រោះថា គ្មាននរណាទុកចិត្តការបោះឆ្នោតនេះទេ។ ហើយរដ្ឋាភិបាលជាច្រើន ដែលជាសមាជិកអង្គការសហប្រជាជាតិ ក៏បានបញ្ជាក់ជំហរមិនគាំទ្ររួចទៅហើយដែរ៖ «គ្មាននរណាទុកចិត្តការបោះឆ្នោតនេះនោះទេ។ រដ្ឋាភិបាលជាច្រើន ដែលជាសមាជិកអង្គការសហប្រជាជាតិ បានបញ្ជាក់ជំហរមិនគាំទ្ររួចទៅហើយ។ អ្នកសង្កេតការណ៍បោះឆ្នោតអន្តរជាតិ ក៏មើលឃើញបញ្ហានេះដែរ។ គ្មានការបោះឆ្នោតណាមួយ សេរី ត្រឹមត្រូវ និង យុត្តិធម៌ ទៅរួចទេ បើរបបមួយរម្លាយគណបក្សប្រឆាំងស្របច្បាប់ ដែលវិះតែនឹងយកឈ្នះបក្សកាន់អំណាច ក្នុងការបោះឆ្នោតកន្លងមក ដោយសារការប្រឌិតបទចោទប្រកាន់ក្លែងក្លាយ។ យុត្តិធម៌យ៉ាងម៉េច បើមេដឹកនាំបក្សប្រឆាំង ត្រូវនិរទេសខ្លួន លោក កឹម សុខា ជាប់ពន្ធនាគារ ដោយសារការចោទប្រកាន់គ្មានមូលដ្ឋាន។ យុត្តិធម៌យ៉ាងម៉េច បើរបបនេះ បញ្ជាលើប្រព័ន្ធផ្សព្វផ្សាយទាំងស្រុង និង ប្រើមន្ត្រីនគរបាល និងតុលាការ ដើម្បីប្រយោជន៍នយោបាយបក្សកាន់អំណាច។ យុត្តិធម៌យ៉ាងម៉េច បើមេទ័ពគ្រាក់ៗ ដើរឃោសនារកសំឡេងឆ្នោត ឲ្យបក្សកាន់អំណាច ដែលតាមពិតអ្នកទាំងនោះ ត្រូវប្រកាន់ជំហរអព្យាក្រឹត្យ។ យុត្តិធម៌យ៉ាងម៉េច បើក្រុមប្រឹក្សាធម្មនុញ្ញ កាន់ជើងបក្សម្ខាង គឺបក្សកាន់អំណាច ហើយមន្ត្រីតុលាការ ក៏កាន់ជើងបក្សតែម្ខាងដែរ។ មិនតែប៉ុណ្ណោះ បើនិយាយពីគណៈកម្មាធិការជាតិ រៀបចំការបោះឆ្នោតវិញ ក៏គ្មានអព្យាក្រឹត្យដែរ គឺកាន់ជើងតែគណបក្សប្រជាជនកម្ពុជា ហើយមន្ត្រីគ្រប់លំដាប់ថ្នាក់ ភ័យខ្លាចអំណាចផ្ដាច់ការរបស់លោក»។
អ្នកវិភាគឯករាជ្យ បណ្ឌិត ឡៅ ម៉ុងហៃ ចូលរួមវេទិកាអ្នកស្ដាប់អាស៊ីសេរី នៅយប់ថ្ងៃទី២៩ ខែសីហា ឆ្នាំ២០១៧។
អ្នកវិភាគលើកឡើងថា របបលោក ហ៊ុន សែន នឹងប្រឈមវិបត្តិធ្ងន់ធ្ងរក្រោយការបោះឆ្នោត គឺវិបត្តិនឹងការរើបម្រាសពីប្រជាពលរដ្ឋក្នុងស្រុក និងក្រៅស្រុក និងវិបត្តិទណ្ឌកម្មសេដ្ឋកិច្ចដែលហ៊ុមព័ទ្ធដោយសហគមន៍អន្តរជាតិ បើសិនជានៅតែគ្មានគណបក្សប្រឆាំងធំជាងគេមិនបានចូលរួមនោះ៕
ប្រភព៖RFA
No comments