ក្រុមមន្ត្រីចុះពិនិត្យទីតាំងអណ្ដូងរ៉ែ ដែលបង្កការពុល
មណ្ឌលគិរីៈ ក្រុមអធិការកិច្ចក្រសួងបរិស្ថាន និងក្រសួងរ៉ែរួមជាមួយអាជ្ញាធរខេត្តមណ្ឌលគិរីកាលពីម្សិលមិញបានចុះពិនិត្យទីតាំងអាជីវកម្មអណ្ដូងរ៉ែមាសក្រុមហ៊ុន រ៉ុង ឆេង នៅភូមិពូទុង ឃុំចុងផ្លាស់ ស្រុកកែវសីមា ដោយសង្ស័យថា លួចបង្ហូរសារធាតុស្យានីដចូលក្នុងទឹកអូរធម្មជាតិដែលបង្កឲ្យពុលស្លាប់មនុស្សក្នុងខេត្តក្រចេះកាលពីដើមខែនេះ។ នេះបើតាមមន្ត្រីមូលដ្ឋាន។
ស្យានីដ ជាសារធាតុគីមីម្យ៉ាងដែលគេប្រើសម្រាប់បន្សុទ្ធ ឬលាងសម្អាតមាស។ ប៉ុន្តែសារធាតុនេះប៉ះពាល់ដល់សុខភាពមនុស្ស និងសត្វជាខ្លាំងដែលអាចធ្វើឲ្យស្លាប់ភ្លាមៗបាន។
លោក ស៊ុន ប៊ុនធឿន អធិការស្រុកកែវសីមាបានថ្លែងថាមន្ត្រីជំនាញបានប្រមូលយកសំណាករួមទាំងទឹកនៅការដ្ឋានអណ្ដូងរ៉ែមាសយកទៅពិសោធ ប៉ុន្តែមិនបានប្រាប់ពីចំនួនការដ្ឋានដែលកំពុងប្រតិបត្តិការយករ៉ែមាសទាំងអត់ច្បាប់ និងមានច្បាប់ទេ។
លោកថា៖ «ខ្ញុំមិនដឹងថាមានការដ្ឋានអណ្ដូងរ៉ែមាស មានច្បាប់ ឬឥតច្បាប់ប៉ុន្មានទេហើយក៏មិនដឹងថា អ្នកជីកមាសទាំងនោះគេប្រើសារធាតុគីមីអ្វីដែរនៅទីនោះ ព្រោះវាមិនមែនជាជំនាញរបស់យើងខ្ញុំទេ»។
កាលពីដើមខែនេះពលរដ្ឋនៅស្រុកចិត្របុរី ខេត្តក្រចេះប្រមាណ ៣០០ នាក់បានកើតអាការចម្លែកហើយត្រូវបានបញ្ជូនទៅមន្ទីរពេទ្យខេត្ត និងមន្ទីរពេទ្យកាល់ម៉ែតរាជធានីភ្នំពេញហើយមានឲ្យអ្នកជំងឺ ១៤ នាក់បានស្លាប់។ មូលហេតុនៃករណីនេះត្រូវបានគេសង្ស័យថាមកពីពុល ស្រា និងទឹក។
ប៉ុន្តែនៅពេលករណីពុលទឹកនេះរាលដាលដល់ខេត្តមណ្ឌលគិរីទើបក្រុមមន្ត្រីជំនាញចុះស្រាវជ្រាវបន្ថែមក៏ប្រទះឃើញសារធាតុស្យានីដក្នុងទឹកតែម្ដង។
រដ្ឋមន្ត្រីក្រសួងឧស្សាហកម្ម និងសិប្បកម្មលោក ចម ប្រសិទ្ធ កាលពីថ្ងៃទី ១៧ ខែឧសភាថ្មីៗនេះក៏បានប្រកាសពីការរកឃើញសារធាតុស្យានីដនៅការដ្ឋានអណ្ដូងរ៉ែមាសខេត្តមណ្ឌលគិរីផងដែរ។ ប៉ុន្តែលោកមិនបានបញ្ជាក់ពីភាពស្របច្បាប់ និងមិនស្របច្បាប់នៃការធ្វើអាជីវកម្មនោះទេ។
ប៉ុន្តែមន្ត្រីបរិស្ថានដែលចូលរួមស្រាវជ្រាវម្នាក់សុំមិនបញ្ចេញឈ្មោះបានថ្លែងកាលពីម្សិលមិញថា សារធាតុស្យានីដដែលត្រូវបានរកឃើញនោះគឺនៅក្នុងបរិវេណការដ្ឋានអណ្ដូងរ៉ែមាសរបស់ «ក្រុមហ៊ុន រ៉ុង ឆេង»។
ជុំវិញសារធាតុស្យានីដនេះមន្ត្រីអភិរក្សសត្វព្រៃនៅក្នុងខេត្តមណ្ឌលគិរីក៏បានសម្ដែងក្ដីបារម្ភផងដែរ ចំពោះកិច្ចគាំពារសត្វព្រៃប្រសិនបើក្រុមហ៊ុនអាជីវកម្មអណ្ដូងរ៉ែមាស នៅតែប្រើប្រាស់សារធាតុប្រភេទនេះដោយគ្មានបទដ្ឋានបច្ចេកទេសត្រឹមត្រូវ និងគ្មានរៀបចំធ្វើជាអាងស្តុកដើម្បីបន្សាបជាតិពុលមុនពេលបង្ហូរចេញទៅតាមប្រព័ន្ធព្រែក ឬអូរធម្មជាតិ។
លោក គង់ ពុទ្ធីរ៉ា ប្រធានគម្រោងដែនជម្រកសត្វព្រៃកែវសីមាបានលើកឡើងថា៖ «ថ្វីបើពេលនេះពុំទាន់មានផ្ទុះករណីសត្វព្រៃក្នុងដែនជម្រករបស់យើងងាប់ក្ដី ប៉ុន្តែប្រសិនបើសារធាតុស្យានីដនេះនៅតែត្រូវបានគេបន្តបង្ហូរចូលទៅក្នុងប្រព័ន្ធទឹកព្រែក និង ទឹកអូរធម្មជាតិនោះ វានឹងបង្កឲ្យមានបញ្ហាប្រឈមយ៉ាងខ្លាំងដល់គម្រោងអភិរក្សសត្វព្រៃរបស់យើង»។
លោកបានបន្ថែមថាជាធម្មតានៅរដូវភ្លៀងធ្លាក់ សត្វព្រៃភាគច្រើនបានបំផ្លាស់ទីទៅកាន់តំបន់ខ្នងភ្នំ ឬទៅទីខ្ពស់ ដើម្បីងាយស្រួលក្នុងការគេចចេញពីគ្រោះទឹកជំនន់ដោយវាអាចរកផឹកទឹកសន្សើម និងទឹកដែលមានដក់នៅក្នុងត្រពាំងឬ ថ្លុកនៅក្បែរជើងភ្នំ។ ប៉ុន្តែបើនៅក្នុងរដូវប្រាំងវិញ ពួកសត្វព្រៃទាំងនោះនឹងធ្វើបំផ្លាស់ទីមកកាន់តំបន់ជាប់មាត់អូរ មាត់ព្រែក ដើម្បីរកទឹកផឹក ហើយប្រសិនបើទឹកអូរ ឬក៏ទឹកព្រែកមានសារធាតុ ស្យានីដ នោះពួកវានឹងត្រូវប្រឈមទៅនឹងជំងឺផ្សេងៗ ឬមួយអាចងាប់ផុតពូជអស់ជាពុំខាន។
ជុំវិញករណីនេះលោក អ៊ុន ឈាងលឹម ប្រធានសមាគមដីរ៉ែមាសដែលមានទីតាំងក្នុងភូមិពូទុង ឃុំចុងផ្លាស់ ស្រុកកែវសីមា ខេត្តមណ្ឌលគិរីបានថ្លែងថា ការធ្វើអាជីវកម្មអណ្ដូងរ៉ែមាសនៃសមាជិកសមាគមរបស់លោកពុំមានប្រើប្រាស់សារធាតុគីមីអ្វីទេ រួមទាំងស្យានីដផងដែរ។
លោកបានបញ្ជាក់ថា៖ «ពួកយើងជីកដីរ៉ែមាសយកមករែងក្នុងទឹកធម្មតាប៉ុណ្ណោះ ពុំដែលចេះប្រើសារធាតុគីមីអីនោះទេ ព្រោះយើងចេះរករបរនេះពីដូនតាយើងតៗគ្នាមក»។
ទោះជាបែបណាក្ដី ការចុះត្រួតពិនិត្យនៅទីតាំងការដ្ឋានរុករករ៉ែមាសដោយអន្តរក្រសួងនេះនៅមិនទាន់ចប់សព្វគ្រប់នៅឡើយទេ ខណៈពេលដែលរបាយការណ៍សំយោគនៃការចុះត្រួតពិនិត្យនេះនឹងត្រូវប្រកាសឲ្យដឹងនៅថ្ងៃចុងសប្ដាហ៍នេះ។ នេះបើតាមលោក យស មុនីរ៉ាត់ អ្នកនាំពាក្យក្រសួងរ៉ែ និងថាមពលបញ្ជាក់កាលពីម្សិលមិញ៕
No comments